NOGARA PRESENTA "NINOGARA"

Dimpués d’o confinamiento, ixas largas y proveitosas horas con os fillos nuestros nos han feito honra pa cavilar en a posibilidat de mas ferramientas que nos aduyen en a educación … Pais, mais y educadors infantils de l’entorno social de Nogará hemos decidiu de crear un grupo d’autoaduya y replega de recursos, pa ninos y ninas que fan parte de familias aragonesofonas.

No ye un punto novedoso dentro de l’actividat de l’asociación y escuela d’aragonés. A Ludoteca pa ninos y ninas “O Lamín” figuró entre as prioridatz de socialización en aragonés mientres buena cosa d’anyos. Tamién as suyas publicacions en a revista “O Espiello”. Pero as cheneracions cambian, y o treballo voluntario tiene siempre la suya buega.

Una nueva tongada de mais y pais embrecados con a educación en aragonés d’os fillos y fillas ha decidiu de crear uns perfils socials an que compartir recursos en aragonés. Serán recursos existens, os mas útils, as novedatz, y atros nuevos que talment faigan falta.

O nombre pa estos nuevos perfil socials en Instagram y Facebook será “Ninogará”, y a partir de hue mesmo podrán estar seguius y consultaus:

-Ninogará naixe como grupo activo de Nogorá de pais, mais y chent relacionada con educación que mira d’aduyar a las familias aragonesofonas en a difícil faina d'educar a fillos y fillas en aragonés.

-L'obchectivo ye replegar totz ixos recursos que ya existen en aragonés, y que os pais y mais fan servir, pero tamién as novedatz que van salindo. Pa informar a la resta de familias que puedan estar-ie intresadas.

-Crear una comunidat d'autoaduya que pueda compartir experiencias en esta faina.

-Empentar un ambient de creación que pueda animar a pais, mais, editorials, escuelas, ... a fer nuevos materials en aragonés.

-Entre a publicidat d'estos recursos amostraremos con videos y/u gravacions a experiencia de pais y/u escuelas que desarrollan a mesma faina en atros puestos d'Aragón, y que no tienen contacto entre ells.